مصيبه صاير ما ادري أنا وشلون أعاملها
اذا ما أقدر أوصلها ولا أقدر أجافيهـــــــا
ولا ادري صدق أنا أهوها أو اني بس أجاملها
أنا اكرهها ولا اكرهها وابيها بس ما ابيهـــــــا
الا من غابت اتمنى ولو في الحلم اقابلهـــا
وجمرة لهفة اشواقي ثواني الوصل تطفيها
تقول اشتقت لايدينك ونفس الشي ابادلهــــا
ولا من شفتها تبرد يديني داخل ايديهـــــــــا
أقاطعها وأقضي الليل اقلب في رسايلهــــــا
أهيم بكل شي منها وانا اكره كل شي فيهـــا
تسولف لي عن الفرقا وانا اتعمد تجاهلهــــا
واسولف ليلة الفرقا لصورتها واناجيهــــــــا
الا جيت اطلب ظلال تلقتني قوايلهـــــــــــا
ولا قلت الفجر وينه تطاول بي لياليهـــــــا
أحس بلذة النظره لعينيهـــا واغافلهـــــــــا
أخاف تشوف بعيوني أنا وش كثر مغليهـــا
أسوي كل ما يمكن من أجل أني أزعلهـــــا
واطوع مستحيل الكون لاجل أني أراضيهــا
أخاف عنادها الصامد واخاف اكثر تساهلهــا
واخاف وضوح حاضرها واخاف غموض ماضيها
محال اقبل تكبرها ولا ارضى عن تنازلهـــا
ولا ادري ويش ابي منها غلاها أو تغليها
يعذبني غلاها لي ويدهشني تحملهــــا
أموت وأعرف ايامي معاها ويش تاليها