الرئيسية
انـا وفكـري والقـلـم والقـوافـي
وليلٍ به اشوف السهر داعـب عيـون
وتشابـه ايامـي وسـر إختـلافـي
وعمرٍ مضى بافراحـه وورث غبـون
ولهفـة عجـولٍ ينتظـر كـل لافـي
وصبر الحكيم اللي إنهكت عزمه طعون
وصفح الحليم ومـدرك النعـم كافـي
وصفعة قوي البـاس يـوم يتلاقـون
وخشية كبار السـن عنـد الطوافـي
وحنة صغـار السـن يـوم يتمنـون
وعقل الكمال ومـورده عـد صافـي
وراسٍ رقا ما طاح لو فـارق متـون
بيّن عليه مـن الزمـن كـل خافـي
وبين عليه من الشقا أبيـض اللـون
وعهد الرفيق وخوتـك يـا السنافـي
يا فزعة اللي من عنا الوقـت يبكـون
أنت السخا يـوم أول الخيـر ضافـي
وأنت الـذرا يـوم الخلايـق يولـون
يا حمود لا تبكـي علـى كـل هافـي
يا حمود هونها تـراك إنـت وتهـون
يا حمود عدّه من احسـاب السوافـي
يا حمود لا تغفا علـى كبـد محـزون
لا قــدّر الله للمشـافـي يشـافـي
ولا قـدّر الله للعزيـزيـن يلـفـون
ولا قـدّر الله للوفـي كـود يـافـي
ولا قـدّر الله لـن عجزتـم يتمـون
بهديـك علـمٍ وإقبلـه وانـت وافـي
دام الزمن ما هو من الكـل مبخـون
يـا كـم عيـبٍ نستـره بالتجـافـي
ويا كـم عيـبٍ بيّـن ومـا يلـدون
بعنـا الكرامـة واشترينـا العوافـي
ودسنا على وجه الثـرا كـل مامـون
واللـي إتلافـه مـا يجـي بئتلافـي
أمسى صويبٍ ممتلي ظهـره طعـون
يا حمـود لا يطغـى بريـق الغلافـي
القول جهـر وتالـي السـر مكنـون
هذا وانا اللـي مـا يفيـد اعترافـي
ومجندين الـواو فـي إمـرة النـون
الخيـر مـن ربٍ كـريـمٍ معـافـي
والحمـد لله خالقـي مُبـدع الكـون
والشـر بـذر كفوفنـا والزعـافـي
يسقى لخلق الله من الخلق بصحـون
