[size=21]ماعشقتك ياحياتـي لجـل أكـون أسبـاب همّـك
لكن الأقدار ساقـت خطوتـي وصرنـا حبايـب
كـن مربـاع الغـلا جابـك لريضانـي يـزمّـك
يدري إني من زمان أتغـزل بطهـر السحايـب
كل ما عانقت ليلـي مـن ضنـى اللهفـه أشمّـك
مدري أسرفتـي بوصلـك أو تعطرتـي هبايـب
لا دعيتينـي أقـول : إن الحـلا كـلّـه بفـمّـك
ولا نظرتي لي أحـس إن الغـلا بالعيـن ذايـب
وإن ضحكتي للسوالف قلت امـوت بخـف دمّـك
وإن عطيتي للمشاعر دمعتـك شفـت العجايـب
ما عرفت أخـص زينـك فتنـة أشواقـي تعمّـك
ياعسى سنين ٍ مضت لي قبل اعرفـك للذهايـب
كـل شـي ٍ فيـك أحبّـه .. الكمـال لله ثـمّ لك
تمتمت فيك المثايـل وأسرفـت فيـك الذرايـب
إنتي اللّـي لا مشيتـي يسـرع الريـح ويخمّـك
منظر أشبه ما يكـون معانـق الغايـب لغايـب
وإنتـي اللّـي لا نثرتـي غرّتـك لليـل ذمّــك
كل نجـم ٍ كـان ودّه يسهـر قلـوب ٍ طرايـب
من شرب حاليك يعـرف بالهـوى شلـون سمّـك
ومن وصل لآخرك جتله جنـة الدنيـا وهايـب
كـل شـي ٍ فـي غيابـك ضايـق ٍ ودّه يضمّـك
كل شي ٍ في حضورك ما يهم لـو كـان غايـب
مـا كتبـت الشعـر إلا .. يـوم بعثرنـي ولمّـك
لي زمان تلمنـي جـروح المشاويـر العطايـب
مو سؤالي ليـه قلبـي ينجـذب يـا بنـت يمّـك
السؤال شلون صرتي ثار .. وعيوني طلايب ..!؟
[/size]