الرئيسية
ياالله مسا خير وش ذا الرقم يبغي بي
نوبٍ يطـول ونـوبٍ يتصـل رنـه
الو الو قلت الو والشوق صاحي بـي
ومن يوم قالت الو جيتك على السنه
تقول انا معجبه واقول طـر جيبـي
ياجعل ابو اللي عطاها رقمي الجنـه
كن صوتها يوم مر اذني يغني بـي
وصار لصدى صوتها في قامتي حنه
من فوق راسي لين أسفل عراقيبـي
كلشن على طور وجهه يردف الونه
قالت بسكر قبل ما الناس تدري بـي
احراج والا بعضهم ما علـي منـه
وقدام لا تنتبـه لا اتفـه عذاريبـي
اللي على خاطرك مااحدٍ درى عنـه
ثم اضحكت ضحكةٍ تقبل وتقفي بـي
خلت خلايا مخيخ الـراس منجنـه
وقالت ابي منـك تحقـق مطاليبـي
ابغي جديدك قبـل ماالنـاس يقرنـه
وسمَعتها واعجبتها وقلت .. ياشيبي
انا بعـد معجـبٍ والنفـس ممتنـه
ودعت ولبيت وقالت لي ياطر جيبي
ياجعل ابو اللي عطاني رقمك الجنه
