الرئيسية
مرت تجر العطر والثقل والزين
وانا مثل كل الشباب .. اوقفوله
عطره يذر العطر على البساتين
ثقله يسولف عن نسب عن حموله
فستانها ذايب بخصره من اللين
وخصره من الفستان ياخذ عموله
ايه والله اني حاسدك يالفساتين
ياحظك بخصره . بعرضه . بطوله
عيونها سيوف العرب يوم حطين
منها النفاذ بجلد قلبك .. بطوله
اقفت وانا عيني عليها لهالحين
مالوم عيني ياخذ العقل .. زوله
وناديتها يامترفه وبطرف عين
قالت انا ..قلت ايه ..قالت اموله
اموله 100 مرحبا .. قالت اهلين
اموله .. عندي بيت ممكن اقوله
قالت لي قوله قلت الانسان من طين
اما انك انتي طين .. ماهي معقوله
انتي اظنك بالعطر .. تستحمين
واجزم بانك بالجمال .. مغسوله
شوفي شكل شفايفك قاهر التين
والجمر يكوي والثمان معسوله
اموله انتي غير كل المزايين
انتي مثل فصل الربيع وحلوله
قالت منين ..وقلت له يعني منين
ماتعرفين اللي ذبل .. من ذبوله
قالت معي القاهرة قلت له وين ؟
عادي تقول القاهرة بكل سهوله
امل .. انا رجال بلشان بالدين
ويني ووين القاهرة يامهبوله
اقساط وحسابات والراتب الفين
حزمة مشاكل اتعبتني .. حلوله
اموله روحي لازم انتي تروحين
انتي المطار مصاحبك من طفوله
وتذكريني عند الاهرام .. تكفين
تذكري حال النحيل .. ونحوله
اموله انتي تذكره .. لاتحجزين
روحي كذا تستقبلك .. اي دوله
